नवीन साहेब
बदल्यांचा सिजन संपलेला असतो. नवीन ठिकाणी पोस्टिंग झालेला साहेब कार्यालयात रुजू होण्याआधीच काही अतिउत्साही मंडळी साहेबाला फोन करून साहेब कधी येणार, कसे येणार असल्या व्यर्थ गोष्टी अनास्थेने पण आस्तेवाईकपणे विचारतात! साहेबाला पण बरं वाटत!! ऑफिसचा पहिला दिवस…साहेब बरोबर वेळेवर पोहचतो!! साहेब कार्यलयात येताच शिपाईसाहेब धुडूधुडू पळत येऊन साहेबाच्या गाडीचा दरवाजा उघडून साहेबाच्या हातातली बॅग ,डायरी अक्षरशः हिसकून घेऊन साहेबाच्या पुढे जाऊन साहेबाच्या टेबल वर पोहच करतो. मग सत्कार , बुके,फेटे , शाली, श्रीफळ, नमस्कार,चमत्कार यांचा पाऊस!! कोण येतंय कोण जातंय साहेबाला मेळ लागत नसतो पण बळच हसून फोटो घ्यायचा कार्यक्रम सुरू असतो. हा कार्यक्रम दोन चार दिवस चालू असतो मग साहेब काम इतर कोणते महत्वाचे काम नसल्यामुळे कामाकडे मोर्चा वळवतो. मग कर्मचाऱ्यांचा आढावा , बैठका ..त्यामध्ये कर्मचारी पण साहेबाला बरं वाटावं म्हणून घाबरल्यासारखं दाखवतात, साहेबाला पण बरं वाटत !! एखाद्याच लक्षण जरा बरं वाटलं नाही तर साहेब त्याला नोटीस काढतो, या नोटिसचा काहीच उपयोग होणार नाही हे त्या कर्मचाऱ्याला आणि साहेबाला पक्के माहीत असतंय पण दुसरं करणार तरी काय??!साहेब एकदम ideal विचार सगळ्यांसमोर मांडत असतो.मी किती शिस्तप्रिय आहे सगळ्यांना सांगत असतो . यापूर्वी साहेब जिथे होता तिथलं प्रशासन त्यानी कस दोरीत आणलं, जुन्या ठिकाणी काय काय दिवे लावले,तिकडे कसं वाळवंट होत आता कसं अमेझॉनच फॉरेस्ट करून टाकलंय सगळं वगैरे वगैरे असले कल्पक उदाहरणं देत असतो. पण काही दर्दी मंडळींनी साहेबाच्या जुन्या पोस्टिंगमधल्या कला,कारनामे , कुटाने, किस्से साहेब जॉईन होण्यापूर्वीच जनहितार्थ सगळ्यांपर्यंत पोहचवलेले असतात.!! तरी पण साहेब मी टिपनिशिवाय सही करीत नाही,प्रत्यक्ष काम पाहिल्याशिवाय बिल काढणार नाही, टपाल मी पाहिल्याशिवाय संबंधित टेबलावर पाठवायचे नाही वगैरे वगैरे stunt चालूच ठेवतो. साहेबांची धडक कारवाई, कामात कुचराई करणाऱ्यांची गय केली जाणार नाही असल काहीतरी पेपर मध्ये छापून येत असतंय! एकंदरीतच आता खऱ्या अर्थाने जनतेला न्याय मिळणार, विकास होणार अस वातावरण तयार झाल्याचा भास निर्माण झालेला असतो. पण आता साहेब नवीन राहिला नाही! साहेबाला काम उरकेना.. नुसता ideal approach चा stunt मारल्यामुळे pendency भरपूर वाढली… सुरुवातीला साहेब नवीन आहे नवीन आहे म्हणून लोक ऐकून घेत होते पण आता तशी परिस्थिती राहिलेली नाही. आता दररोज कुणीपन येऊन साहेबाला चेक मेट करायला लागलंय. एकंदरितच परिस्थिती हाताबाहेर चाललेली असते. अशा प्रकारे सुप्रशासनाचा उत्तम नमुना बनण्याचा चंग बांधलेला साहेब कोंबडशाहीमध्ये रूपांतरित होतो आणि सुरु होत एक नवीन पर्व: दिसला शिक्का की हान कोंबडा!!( जसा मागच्या पोस्टिंग च्या वेळेस झाला होता तसाच, मग कशाला प्रयत्न करायचा?!!). मग प्रशासन तर गतिमान होणारच. त्यातली त्यात तेच तेच तक्रारकर्ते दररोज येऊन साहेबाच्या डोक्याचं दही करतेत, प्रश्न तर सुटत नाहीतच… मग हे शिस्तप्रियसाहेब ऑफिसात कधी येतेत कधी जातेत काहीच मेळ लागत नाही.. साहेबाचा performance चांगलाच घसरत जातो(नेहमीप्रमाने). साहेबाचे कर्मचारी पण साहेबांचं लै मनावर घेत नाहीत. एरवी पहिल्या ring ला फोन उचलणारे काही मुजोर कर्मचारी(obiviously हा मुजोरपणा साहेबांच्या पुण्याईमुळेच!!!)आता साहेबांचा missed call पडला तरी call back करीत नाही. ह्या सगळ्याला वैतागून साहेब चिडचिड करतो पण काय उपयोग होत नाही,उलट एखादा कामचुकार कार्यकर्ता साहेबाला म्हणतो : कशाला लोड घेता साहेब? आता काय बोलणार? एकंदरीत ही परिस्थिती बदली करण्यासाठी अनुकूल झालेली आहे. Now Saheb trying for transfer desperately( म्हणजे join झाल्यापासून एक वर्ष साहेब नवीन आहे नवीन आहे अस म्हणत जाणार आणि शेवटचं वर्ष साहेब जाणार आहे जाणार आहे अस करून जाणार ..आणि मधल्या काळात विकास,जनकल्याण, अमेझॉनचं फॉरेस्ट असल्या अंधश्रद्धा वगैरे वगैरे). पण बदली काय अशीच होत नाही. शेवटच्या overs बाकी असतात आणि runrate खूप वाढला आहे!! एरवी नियमाच्या चाकोरीत चालणारा साहेब आता एकदम customise झालेला असतो. शॉट चुकीचा गेला तरी चालेल पण स्कोर वाढला पाहिजे हे डोक्यात, ह्या नादात भरपूर चुकीचे शॉट जातेत पण साहेबांच लक्ष नसतंय… score वाढवण्याच्या नादात साहेब पुढच्या येणाऱ्या साहेबांच्या वाट्याच्या 2-4 match च्या runs पणठोकून काढतो…मग एकदाची बदली होते आणि साहेब एकदाचा सुटतो. हा साहेब सुटण्याचा आणि नवीन साहेब join होण्याचा मधला सुवर्णकाळ भेदण्यासाठी त्याच कार्यालयातील चार्जोत्सुक ज्युनिअर साहेब पण तयारच असतो…जुना साहेब नवीन ठिकाणी नवीन साहेब होण्याच्या तयारीत रवाना होतो… पुन्हा नवीन साहेब,नवीन ध्येय, नव्या आशा, नव्या दिशा , नवीन कला, नवे कुटाने, नवे कारनामे, नवीन किस्से , नवीन वाळवंट, नवीन फॉरेस्ट, नवीन विकास….पुन्हा एकदा भ्रमनिरास!!!….जनहितार्थ
(वरील लेखनप्रपंच हा निव्वळ विनोदबुद्धीने व अतिशय मर्यादित अनुभवावर आधारित आहे. यामधून कोणत्याही अधिकाऱ्यांच्या मनाला ठेच लागावी असा मुळीच उद्देश नाही. तसेच सर्व कर्मचारीवर्ग , परिचर वर्ग यांचा पूर्ण सन्मान ठेऊन हे लिखाण आहे. तसेच उपरोक्त उल्लेखलेल्या साहेबाच्या पात्रामध्ये आपण स्वतःला प्रतिबिंबित न करता देखील हा लेख वाचण्याचे आपले स्वातंत्र्य अबाधित आहे!!! तसेच ज्यांना वाटतंय वरच्या साहेबांच्या कर्मचाऱ्यांच्या role मध्ये आपण चपखल बसत आहोत त्यांनादेखील तसे express न करण्याची मुभा आहे)
@गोविंद खामकर
सदरील लेखनप्रपंच हा निव्वळ विनोदबुद्धीने व सर्व अधिकारी ,कर्मचारी, संघटना यांच्याशी संपूर्ण आदर बाळगून लिहिला आहे तसेच हे लिखाण अत्यंत मर्यादित व अपवादात्मक अनुभवावर आधारित आहे
- E-निविदा
- अनुकंपा
- अर्थ विभाग
- आकृतीबंध
- आरोग्य विभाग
- कालबद्ध पदोन्नती
- कृषी विभाग
- केंद्र पुरस्कृत
- ग्रामपंचायत विभाग
- ग्रामीण पाणीपुरवठा विभाग
- जिल्हा ग्रामीण विकास योजना
- जेष्ठता सूची
- निलंबन
- पदोन्नती
- पाणी व स्वछता विभाग
- प्रशासनिक विनोदी लेखन
- बदली
- बांधकाम विभाग
- बालकल्याण विभाग
- महसूल विभाग
- रजा
- राज्य पुरस्कृत
- विभागीय चौकशी
- शासकीय पुस्तके
- शासकीय योजना
- शिक्षण विभाग
- समाजकल्याण विभाग
- सामान्य प्रशासन विभाग